البنت الجديدة

اتغيرت كتير اوي واللي حواليا اتعودوا و أنا اللي مش قادرة أتعود
قبل كدة عمري ما كنت مبسوطة ولا راضية عن نفسي بس يمكن أكون كنت "ساكنة"
بس دلوقتي مابقتش عارفة أنا مين.....بقيت محتارة...فعلا مابقتش عارفاني

جوايا حاجات اتبدلت ومبادئ اتكسرت و مبادئ جديدة اتبنت مع الوقت
قيود كسرتها و خطوط حمرا عديتها
حاجات عملتها عمري ما كنت أتصور اني ممكن اعملها
شعري القصير طول
ضوافري الضعيفة قويت

و فوق كل دة
في جوايا قلب اتكسر و ضاع مني ..بقيت ماشية بدور عليه و لحد دلوقتي مش لاقياه
اديتو لحد و الحد دة رماه و ماقليش رماه فين
استسلمت لحب غيّر فيّا حاجات كتير
وكنت فاكراه هو الأمل اللي هياخدني لفوق بس خذلني

بقي في جوايا حزن عميق مش عارفة ممكن يتردم ولا لأ

زمان كان العادي اني بعيط من اسباب بيقولوا عليها تافهة
دلوقتي بقي عياطي من غير سبب هو الحاجة العادية


ناس خرجوا من حياتي وناس جداد دخلوا
ناس أثرت فيا بالسلب كتير و في نفس الوقت أثروا قليل بالايجاب ..و ناس العكس
أصحابي مابقوش اصحابي و اللي مش أصحابي بقوا أصحابي
اللي شبههم مابقتش شبههم واللي مش شبههم بقيت شبههم

عملت حاجات كتير من ورا سجاني (أهلي)  و كسرت القيود وماكنتش اعرف اني ممكن اعمل كدة

عمري ما كنت محتاجة لحضن و حد ابكي علي كتفه زي دلوقتي
كنت دايما بلاقي حضن ماما دلوقتي مش لاقياه حاساني غريبة عنه و عنها

ليه كل دة حصل فيا مابقتش عارفة و مابقتش فاهمة
مش عايزة أرجع زي ما كنت بس مش قادرة اتأقلم مع البنت الجديدة دي

البنت الجديدة متحررة
البنت الجديدة جريئة
البنت الجديدة مابتخفش
البنت الجديدة مابتسكتش علي حقها
البنت الجديدة بتعمل اللي في دماغها
البنت الجديدة مش بتفكر غير في اللي في مصلحتها و مايضرش حد وبس

...........بس

البنت الجديدة مكسورة
البنت الجديدة تايهة
البنت الجديدة حزينة
البنت الجديدة بتضحك من براها و جواها بيتقطع
البنت الجديدة دموعها مابتنشفش
البنت الجديدة نسيت الفرحة اللي من القلب

البنت الجديدة كل الناس اتعودت عليها
البنت الجديدة انا فعلا مش عارفاها