حدوتة جديدة

فكرة الحب انا مش فاهماها  بحس انه تفاعل كيميائي معقد داخلة فيه نظرية فيزيائية حيوية مالهاش تفسير
خلايا عقلي المنمنمة أصغر بكتير من انها تفهمه

لما وقعت في أول حدوتة حسيت ان ده نهاية المطاف و إن الدنيا كلها هتوقف علي رِجل عشان أنا أبقي سعيدة

و طيرت لفوووق أوي بس وقعت ، وقعت و اتكسرت ، وحسيت ان كل فتفوتة منمنمة فيا بقت في حتة و عمرها ما هترجع مع بعضها تاني

وقولت ماهو أنا اللي عملت في نفسي كدة علّقت نفسي بالحبال الدايبة

و قفلت قلبي و كتبت عليه ممنوع الاقتراب .. معطّل للتصليح

ماكنتش مقتنعة اني ممكن أدخل كهف الحب الغريب دة تاني ، ماكنتش فاكرة اني هقف تاني اودام بحر الحب و أتشد لدوامته من جديد

بس اللي حصل اني استسلمت تاني و رجعت لحمت فتافيتي المتنطورة و حبيت، حبيت و غرقت في الحب من ساسي لراسي

بس المرة دي الحدوتة جديدة تفاصيلها جديدة و بطريقة جديدة

المرة دي أنا شايفة حبيبي عايز ياخد بإيدي بس مش قادر، و بيبعد عني و هو مش عايز

في الوقت ده أنا بستجمع فيه كل قوتي اللي اتبعترت مني عشان اديله كل ذرة فيها
عشان اديله القوة اللي بيها نقدر نقاوم الحزن اللي من كتر ماهو متعبّي جوانا خلّي معنوياتنا هشّة و أجنحتنا أرق و أضعف من انها تقاوم

وحدة بناء قوتي هي الحب

حبي ليك - يا عمري انت - هو سبيلي لقوتي ، ليه انت كمان حبك ليا مش سبيل لقوتك؟

حِبني و ماتخافش ، حِبني و ماتخذلنيش ، حِبني و خد قوتك مني ، حِبني و لو ضعفت تعالي استخبي في حضني ، حِبني و ماتقولّيش،
 بس ماتحرمنيش من وجودك خليك موجود و مش مهم اسم وجودك ايه دلوقتي .. ماتبعدش عني وانت روحي معاك و تفاصيلك مستخبية في كل خلية في قلبي