يمكن اكون ماشوفتكش
يمكن اكون قصّرت في حقك 6 شهور
يمكن اكون اخدت وقت و اترددت اني اوعدك اني لازم اجيبلك حقك
يمكن اكون اخدت وقت كبير علي الغشاوة ما وقعت من علي عينيا
يمكن اكون لحد دلوقتي مش عارفة اجيبلك حقك و متكتفة
يمكن الحلم بعيد و كل ما بنقرب بيبعد أكتر
يمكن في مننا تعبوا
يمكن في مننا استسلموا
يمكن في مننا راحولك دلوقتي و قاعدين معاك و بيحكولك علي اللي حصل في السنتين من بعدك
بس أكيد
انت شايف كل اللي بيحصل
وأكيد عاذر كل اللي اتردد
وأكيد شايفنا و بتفرح مع كل خطوة بنخطيها عشان نجيبلك حقك انت و كل اللي معاك في الجنة دلوقتي
وأكيد انت عارف ان جوا كل واحد مننا ايمان بان لازم نحقق الحلم حتي لو هو بيهرب مننا
وأكيد بتيجي تسند اللي تعبوا و تقلهم كملوا حقي لسة ماجاش
وأكيد بتيجي نور في ليل اللي استسلم تقوله لسة الطريق طويل مش وقت تعب ولا استسلام ماعدش ينفع ترجع تاني جبان
وأكيد احنا هنصون الوعد
وأكيد هندفع اخر نقطة دم عشان نوفي الدين اللي علينا ليك.. اللي انت دفعته من دمك الغالي عشان ترجعلنا بصيرتنا
وأكيد مش هنسامح نفسسنا لو ماقدرناش نعوض أمك العظيمة عن كل دمعة نزلت من عينها وهي في كل الأوقات دايما أم لينا كلنا
خالد ....عارفة انك مش سعيد باللي احنا فيه بس اللي عارفاه كمان انك خالد جوا كل واحد فينا
ومافيش حد فينا هيسامح نفسه لو ساب دمك يروح هدر
ليست هناك تعليقات:
إرسال تعليق