مش هتسكتونا

الست المصرية اقوي منكم
الست المصرية مابتتهدش ولا بتتهدد
الست المصرية هتفضل شوكة في حلقكم
الست المصرية هتفضل تقول لأ
الست المصرية مش هتبطّل تنزل و تطالب بحقوقها و حقوق كل انسان عايش علي ارض البلد دي
الست المصرية ماتنكسرش عشان كلب اباح لنفسه ان يمد ايده عليها
الست المصرية مش بتخاف من الحيوانات الضالة اللي عايزة تنهش فيها
الست المصرية قوية و هتقدر علي كل الحيوانات الضالة دي
الست المصرية هتقضي بقوة ارادتها علي كلمة "تحرش" الست المصرية هتفضل تأدي دورها في ثورة بلدها لحد ما تنجّحها

انا بنت مصرية انسان حر

انا مش مستباحة لحد و جسمي ملكي لوحدي
واللي يبرر انه ينتهك ملكيتي و يعتدي عليها مالوش اي ممبررات
واللي يبرر لنفسه انه يحط ايده عليا يبقي تتقطعله و مش هو و بس وكمان اي حد يساعده في خلق المبررات دي
هلبس اللي علي مزاجي و مش هسكت لو حد قربلي و مش هسكت لاي حد يقول الفقر او الجهل
انا "انثي" و مش بتكسف من انوثتي و مش  بخبيها و فخورة بيها
 و هحافظ عليها من اي كلب يبقي عايز ينهشها
و مش عشان انزل مظاهرات لازم افكر الف مرة في نوع لبسي ولا في شكل تجسيم لبسي لجسدي
ومش من حق حد يقول اصلها بشعرها او اصلها لابسة عباية كباسين او لابسة مشد صدر ازرق
أنا ألبس اللي انا عايزاه خارجيا و داخليا
و مش هسيب الأوغاد يحققوا اللي هما عايزينه و يكسروني
و هفضل اطالب بحقي اني اعيش مكرّمة و حرة و يحترمني  ويحترم حقوقي كل كائن حي في البلد دي
ومافيش حاجة اسمها "التحرش مش وقته" ...أومال عايزين وقته امتي ان شاء الله!!!!
        ....لما تخرب مالطا

حقي هاخده و مش هقف ساكتة و انا بشوف نفسي بيتم انتهاكي
 ومش هتقدروا تسكتونا