عايزة و عايزة "قابلة للتحديث في اي وقت"

عايزة أشتغل
عايزة أتخرّج
عايزة أخرج
عايزة أسافر
عايزة أشتري فستان
عايزة أجيب لاب توب جديد
عايزة أجيب موبايل جديد
عايزة أتعلم سواقة
عايزة أجيب عربية
عايزة أجيب شقة بتاعتي و أعيش لوحدي
عايزة أصبغ شعري
عايزة أجيب بغبان أو عصافير
عايزة أمشي لوحدي علي النيل و ماحدش يكلمني و أكون بسمع أنغام و فيروز
عايزة أكل شيكولاتة براحتي من غير ما أخاف من الحبوب اللي بتطلع في وشي
عايزة أعيط في حضن حد و مايسألنيش ليه
عايزة أعيش قصة حب حقيقية و حبيبي يكون بيخاف عليا و يستحملني و أنا مجنونة و وأنا متعصبة و وأنا عاملة نفسي بفهم  وبتفزلك و أنا أصلا مش فاهمة حاجة و وأنا بتدلع بسهوكة و يستحملني و أنا منكوشة و لما ماكونش طايقاه ولا طايقة اشوفه و يستحمل اني عايزة المساحة بتاعتي و يكون موجود لما احتاجه و يكون متأكد اني اي حاجة هعملها هتبقي عشانه وبس
عايزة أعوم في شلال مع حبيبي

عايزة أجيب بنت و أسميها "أشرقت"

عايزة أعمل كل اللي نفسي فيه من غير ما أزعّل ربنا مني
عايزة أغني بصوت عالي
عايزة أقول "لأ" لكل حاجة متعبة
عايزة أبطل اشوف اطفال في الشوارع من غير بيوت
عايزة أبطّل أسمع مآسي الناس التعبانة
عايزة أشوف البلد دي أحسن بلد في الدنيا

عايزة راحة بال